ការអភិវឌ្ឍជីវភាពសហគមន៍ និងការគ្រប់គ្រងធនធានព្រៃឈើ និងជីវចម្រុះគឺជាធាតុផ្សំដ៏សំខាន់មួយនៅក្នុងការអភិរក្ស និងអភិវឌ្ឍន៍រមណីយដ្ឋានប្រាសាទព្រះវិហារ។ គម្រោងទទួលថវិកាពីមូលនិធិដាវីន និងអនុវត្តន៍គម្រោងនៅថ្ងៃទី០១ កក្កដា ២០២០ ដល់ ៣១ មីនា ២០២៣។
គោលបំណងគម្រោងកសិកម្ម និងព្រៃឈើ គឺបង្កើនសុវត្ថិភាពចំណីអាហារ ប្រាក់ចំណូល ប្រសិទ្ធភាពប្រើប្រាស់ដី និងបរិស្ថានល្អតាមរយៈការជម្រុញកសិកម្មចម្រុះ ឬហៅថាកសិរុក្ខកម្ម ការលើកកម្ពស់ទីផ្សារនិងការស្តារព្រៃឈើឡើងវិញ។ គម្រោងនេះអនុវត្តតាមរយៈកិច្ចសហការរវាងដៃគូរជាតិ និងអន្តរជាតិ ចំនួនបីក្នុងនោះមានអង្គការអភិរក្សសួនភូត្តគាមអន្តរជាតិ(BGCI) មានស្នាក់ការនៅប្រទេសអង់គ្លេស ជាប្រធានគម្រោង អង្គការមជ្ឈមណ្ឌលកសិរុក្ខកម្មពិភពលោក (ICRAF) មានស្នាក់ការនៅប្រទេសវៀតណាមជួយលើផ្នែកបច្ចេកទេស និងអាជ្ញាធរជាតិព្រះវិហារជាអ្នកអនុវត្តន៍ការងារនៅទីវាល។
លទ្ធផលសំខាន់ៗសម្រេចបានដោយគម្រោងរួមមាន៖
-សិក្សាស្រាវជ្រាវអំពីសេដ្ឋកិច្ចសង្គម បច្ចេកទេសកសិកម្មមានស្រាប់ ធនធានដី និងទីផ្សារ កសិផល។
-ជ្រើសរើសចម្ការដំណាំសម្រាប់ធ្វើជាគម្រូ បង្ហាញដល់កសិករផ្សេងៗ និងគ្រូបង្គោលចំនួន២២នាក់ ដែលជាសមាជិកសហគមន៍ និងក្រុមប្រឹក្សាឃុំ។
-ផលិតឯកសារបង្រៀន និងអប់រំផ្សព្វផ្សាយដូចជា បច្ចេកទេសដាំ និងថែទាំឈើហូបផ្លែ សៀវភៅផ្នត់អំពីកសិរុក្ខកម្ម និងផ្ទាំងរូបភាពបង្ហាញអំពីបច្ចេកទេសកសិរុក្ខកម្ម និងការគ្រប់គ្រងព្រៃឈើ។
-បណ្តុះបណ្តាលគ្រូបបង្គោលលើមុខវិជ្ជាផ្សេងៗដូចជា បច្ចេកទេសកសិរុក្ខកម្ម ការដាំនិងថែទាំឈើហូបផ្លែ ការផលិតជីនិងថ្នាំពុលសរីរាង្គ ការសាកផ្សាំកូនឈើហូបផ្លែ និងយុទ្ធសាស្រ្តទីផ្សាកសិផល។
-ផលិតវីដេអូរខ្លីៗផ្សព្វផ្សាយអំពីបច្ចេកទេសកសិកម្ម និងការផលិតជីសរីរាង្គចំនួន១៣រឿង ដោយកញ្ញា លី លាន បេក្ខភាពបណ្ឌិតផ្នែកផ្សព្វផ្សាយកសិកម្ម។
-ផ្តល់កូនឈើហូបផ្លែសំខាន់ៗរួមមាន ដូង ពុទ្រា មៀនយីហ៊ុត ខ្នុរការ៉ុត ត្របែក ក្រូចថ្លុង និង ពូជដំណាំផ្សេងៗដូចជា ម្នាស់ ខ្ញី រំដេញ ត្របពុតលំញង ម្ទេសអាចម៍សត្វ ននោងជ្រុង ត្រឡាចស្រូវ និងល្ពៅ ដល់កសិករចំនួន ២០២គ្រួសារ ដើម្បីដាំក្នុងចម្ការកសិរុក្ខកម្ម។
-រៀបចំវគ្គផ្សព្វផ្សាយអំពីកសិរុក្ខកម្ម និងជម្រុញការដាំដំណាំ មានសក្តានុពលទីផ្សារដល់កសិករចំនួន១១៦នាក់ នៅភូមិធម្មជាតិសម្តេចតេជោហ៊ុនសែន ភូមិខាងស្រអែមជើង ភូមិសែនជ័យ និងភូមិតេជោបុស្សស្បូវ។
-រៀបចំវគ្គបណ្តុះបណ្តាលដល់កសិករចំនួន៨៨នាក់មកពីភូមិទាំង៤អំពីបច្ចេកទេសការពារ ដំណាំ និងឈើហូបផ្លែ ពីការបំផ្លាញដោយចែស និងស្រាងទិកផ្លែដែលកើតមានសព្វថ្ងៃ។
-សម្របសម្រួលរៀបចំបណ្តាញទីផ្សារកសិផលក្នុងភូមិទាំងបួន ដើម្បីកសិករអាចលក់ផលិតផលរបស់ខ្លួនដែលដាំបាន។
-ចូលរួមចំណែកដល់ការគ្រប់គ្រងធនធានព្រៃឈើរួមមាន ការរៀបចំផែនការស្តារព្រៃឈើឡើងវិញ បណ្តុះកូនឈើ និងស្តារព្រៃឈើឡើងវិញ។
