ប្រាសាទក្រហម មានកម្ពស់ខ្ពស់ជាងគេក្នុងចំណោមប្រាសាទឥដ្ឋទាំងអស់ នៅរមណីយដ្ឋានប្រាសាទកោះកេរ។ ប្រាសាទនេះសាងពីឥដ្ឋ ដើម្បីតម្កល់បដិមាព្រះឥសូររាំមានកម្ពស់៥ម៉ែត្រ ទទឹង៣ម៉ែត្រ និងមានទម្ងន់ប្រមាណ៧តោន ស្ថិតនៅលើបល្ល័ង្គលម្អដោយចម្លាក់តោនៅជុំវិញ។ តាមរូបថតចាស់ៗបានបង្ហាញថា បដិមាព្រះឥសូររាំនេះបានដួលរលំក្នុងទសវត្សឆ្នាំ១៩៩០ ដោយការវាយបំបែកដើម្បីងាយស្រួលលួចយកចេញ។ នៅជុំវិញបដិមាព្រះឥសូរាំមានបដិមាព្រះនាងឧមារាំ បដិមាចាមុណ្ឌា និងព្រះស្កន្ទគង់លើក្ងោក។ ចាប់ពីឆ្នាំ២០១២មក បានចាប់ផ្តើមកិច្ចសហការរវាងអាជ្ញាធរជាតិអប្សរា បន្ទាប់មកអាជ្ញាធរជាតិព្រះវិហារ ជាមួយសាលាបារាំងចុងបូព៌ាប្រទេស(EFEO)។ ក្រុមបុរាណវិទ្យាធ្វើកំណាយស្រាវជ្រាវ នៅខាងក្នុងប្រាសាទក្រហម និងប្រមូលបានបំណែកព្រះឥសូររាំប្រហែល២៥០០បំណែក។ នៅខែមេសា ឆ្នាំ២០១៩ ក្រុមការងារជួសជុលបានផ្គុំរូបសំណាកព្រះឥសូររាំឡើងវិញ ធ្វើ3D និងធ្វើសិក្ខាសាលាទាក់ទងជាមួយការអភិរក្ស និងជួសជុលបដិមានៅខេត្តសៀមរាប ដែលចូលរួមពីក្រុមអភិរក្សថ្មពីប្រទេសបារាំង និងកម្ពុជា។
គោលបំណងដើម្បីលើកតម្លៃ និងលើកកម្ពស់ការយល់ដឹងអំពីផលវិបាកដែលបណ្តាលពីការលួចវត្ថុបុរាណ អាជ្ញាធរជាតិអប្សារា សាលាបារាំងចុងបូព៌ា និងអាជ្ញាធរជាតិព្រះវិហារបានសហការគ្នារៀបចំគម្រោងជួសជុល បដិមាព្រះឥសូរឡើងវិញដោយធ្វើការផ្គុំបំណែកតូចធំសរុបជាង១០០០០បំណែក ដែលបានមកពីកំណាយស្រាវជ្រាវ និងការប្រមូលពីបរិវេណជុំវិញប្រាសាទក្រហម។
ជាលទ្ធផលទទួលបាន គឺអាចចាប់ផ្តើមដំណាក់កាលទីពីរ និងបន្តការជួសជុលបន្ថែមផ្នែកដងខ្លួន។ នៅខែមករា ឆ្នាំ២០២២ បានជួសជុលឡើងវិញផ្នែកជើងទម្រព្រះឥសូរ និងប្រើប្រាស់លោហធាតុ ដើម្បីទ្រទម្ងន់ដងខ្លួន ប្រហែល៦០០គីឡូក្រាម។ ការជួសជុលនឹងបញ្ចប់នៅចុងឆ្នាំ២០២៤ បន្ទាប់មកនាំយកបដិមាព្រះឥសូរនេះទៅដង្កល់នៅរមណីយដ្ឋានប្រាសាទព្រះវិហារវិញ។
