ប្រាសាទរាមកេរ្តិ៍ មានទីតាំងនៅជម្រាលខាងជើងឈៀងខាងលិច(ពាយ័ព្យ)របស់រហាល នៅក្នុងបរិវេណភូមិកោះកេរដែលមានចម្ងាយប្រមាណ៨០ម៉ែត្រភាគខាងត្បូងប្រាសាទដង់ទង។ ប្រាសាទនេះសាងពីថ្មបាយក្រៀម ឥដ្ឋ និងថ្មភក់ មានប្លង់ជាចតុកោណកែងបែរមុខទៅទិសខាងកើត ប្រាសាទទោលនេះបែរមុខទៅទិសខាងកើត និងមានបណ្ណាល័យតូចមួយសង់ពីឥដ្ឋបែរមុខទៅទិសខាងលិច។ បើសិក្សាទៅលើសំណង់ស្ថាបត្យកម្ម ប្រាសាទនេះសង់ដំណាលគ្នានឹងប្រាសាទដងទង់បានសេចក្តីថា សង់មុនពេលព្រះបាទជ័យវ័រ្មនទី៤ ធ្វើការផ្លាស់ប្តូររាជធានីពីអង្គរមកកោះកេរ។ ប្រាសាទនេះបានដួលរលំ ហើយយើងអាចមើលឃើញត្រឹមតែសំណល់ជញ្ជាំងថ្មបាយក្រៀម និងជើងទម្រមួយនៅខាងក្នុងនោះតែប៉ុណ្ណោះ។ ប្រាសាទរាមកេរ្តិ៍មានកំពែងព័ទ្ធជុំវិញ សង់ពីថ្មបាយក្រៀមដែលសព្វថ្ងៃនៅមានសំណល់ថ្មកំពែងខ្លះដែលនៅសល់។តាមប្រភពព័ត៌មានពីអ្នកស្រុកនៅក្នុងប្រាសាទនេះកាលពីដើមបានដាក់តម្កល់រូបបដិមាព្រះឥសូរ។
