Wednesday, December 20, 2023
ថ្ងៃពុធ ០៨ កើត ខែមិគសិរ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២០ ខែធ្នូ ឆ្នាំ២០២៣ អាជ្ញាធរជាតិព្រះវិហារ បានសហការជាមួយអាជ្ញាធរដែនដី និងសាលារៀនអនុវិទ្យាល័យភ្នំឆ័ត្រសែនជ័យ រៀបចំយុទ្ធនាការផ្សព្វផ្សាយ និងប្រមូលសំរាមប្លាស្ទិចតាមដងផ្លូវក្នុងភូមិសែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ។ យុទ្ធនាការនេះ មានអ្នកចូលរួមសរុបចំនួន៧៥នាក់ រួមមានថ្នាក់ដឹកនាំ មន្រ្តី និងពលករអាជ្ញាធរជាតិព្រះវិហារ មេភូមិ អនុភូមិ ជំនួយការភូមិ ប្រជាការពារភូមិ ប្រជាពលរដ្ឋ លោកគ្រូ អ្នកគ្រូ និង សិស្សានុសិស្សនៃសាលាអនុវិទ្យាល័យភ្នំឆ័ត្រសែនជ័យ។
យុទ្ធនាការផ្សព្វផ្សាយ និងប្រមូលសំរាមនេះធ្វើឡើងក្នុងគោលបំណងសំខាន់ចំនួនបីគឺ ១)សម្អាតសំរាមរាយប៉ាយតាមដងផ្លូវដើម្បីលើកកម្ពស់សោភ័ណភាពក្នុងភូមិ ២) អប់រំដល់ប្រជាសហគមន៍ឱ្យយល់អំពីបញ្ហាសំរាមដល់សុខភាព បរិស្ថាន និងជីវភាពរស់នៅប្រចាំថ្ងៃ និង៣) បញ្ជ្រាបការយល់ដឹងដល់ប្រជាពលរដ្ឋឱ្យចេះទុកដាក់សំរាមបានត្រឹមត្រូវនៅតាមផ្ទះ និងកុំបោះសំរាមចោលតាមទីសាធារណៈ ដើម្បីរក្សាបាននូវបរិស្ថានស្អាតក្នុងសហគមន៍រស់នៅរបស់ខ្លួន។
