Saturday, June 21, 2025
នៅថ្ងៃសៅរ៍ ១១រោច ខែជេស្ឋ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី២១ ខែមិថុនា ឆ្នាំ២០២៥ ឯកឧត្តម ផេង សំអឿន អគ្គនាយករង តំណាង ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ បានប្រគល់បំណែកបដិមាចម្លាក់ទេព(ព្រះកេសទេវតា) ចំនួន១ ជូន ឯកឧត្តម ហង់ ពៅ អគ្គនាយកអាជ្ញាធរជាតិអប្សរា ដើម្បីយកទៅភ្ជាប់ជាមួយដងខ្លួនវិញក្នុងផែនការជួសជុលបដិមាទេវតា និងអសុរនៅខ្លោងទ្វារជ័យនៃក្រុងអង្គរធំ។ បំណែកបដិមានេះ បានខ្ចីពីអភិរក្សដ្ឋានអង្គរមកថែរក្សា និងតាំងបង្ហាញនៅសារមន្ទីរធម្មជាតិសកលសម្ដេចតេជោ ហ៊ុន សែន ព្រះវិហារតាំងពីកំឡុងឆ្នាំ២០១២ ប៉ុន្តែពេលនេះត្រូវយកទៅភ្ជាប់ជាមួយដងខ្លួននៅទីតាំងដើមវិញជាការលើកតម្លៃប្រវត្តិសាស្ត្រអតីតក្រុងអង្គរធំនៃអាណាចក្រអង្គរ។
