បន្ទាប់ពីប្រាសាទព្រះវិហារ បានចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូ នៅឆ្នំា២០០៨រួចមក ការងារជាច្រើនបានគិតគូរ និងយកចិត្តទុកដាក់ពីរាជរដ្ឋាភិបាលកម្ពុជា ក្នុងការរៀបចំ និងស្ថាបនាលើគ្រប់វិស័យ ដើម្បីឲ្យរមណីយដ្ឋានមួយនេះមានសុវត្ថិភាព សាភ័ណ្ឌភាព និងអាចទទួលភ្ញៀវទេសចរមកទស្សនាបានល្អប្រសើរ។
គម្រោងស្ថាបនាមណ្ឌលបដិសណ្ឋាកិច្ចទេសចរបានរៀបចំឡើងនៅឆ្នាំ២០០៩ ក្នុងគោលបំណងរៀបចំជាកន្លែងទទួលភ្ញៀវទេសចរជាតិ និងអន្តរជាតិ មកទស្សនាប្រាសាទព្រះវិហារ ដោយធ្វើដំណើរឡើងដោយជើងទៅកាន់គោបុរៈទី៥នៃប្រាសាទព្រះវិហារតាមជណ្តើរបុរាណខាងកើត។ គម្រោងនេះបានរៀបចំ ស្ថាបនាអគារ និងសំណង់សំខាន់ៗមួយចំនួនដូចជា អគារបដិសណ្ឋារកិច្ចទទួលភ្ញៀវទេសចរ ចំណត ទីសក្ការៈបូជាលោកតាឌី និងដងទង់ជាតិ ដែលមានទីតាំងស្ថិតនៅជើងភ្នំក្បែរជណ្តើរបុរាណខាងកើតភ្នំប្រាសាទព្រះវិហារ។ ការស្ថាបនាអគារ និងហេដ្ឋារចនាសម្ព័ន្ធពាក់ព័ន្ធតាមគម្រោងលើកឡើងនេះ គឺអនុវត្តដោយអាជ្ញាធរជាតិព្រះវិហារ និងឧបត្តម្ភថវិកាដោយមូលនិធិបាយ័ន។
ជាលទ្ធផលទទួលបានមកពីគម្រោងនេះយើងមាន អគារបដិសណ្ឋារកិច្ចទទួលភ្ញៀវទេសចរចំនួន១អគារ ស្តូបលោកតាឌី និងដងទង់ជាតិ។
