ព្រៃឈើបានផ្តល់នូវគុណតម្លៃលើសលប់ដល់រមណីយដ្ឋានទាំងមូលដូចជា អនុផលព្រៃឈើដ៏សម្បូរបែបសម្រាប់លើកកម្ពស់ជីវភាពប្រជាសហគមន៍ ទីជម្រកជីវៈចម្រុះគ្រប់ប្រភេទ និងផ្តល់ទេសភាពធម្មជាតិដ៏ស្រស់ត្រកាល។
គោលបំណងនៃការដាំដើមឈើឡើងវិញ គឺដើម្បីស្តារតំបន់រេចរិលឲ្យទៅជាព្រៃធម្មជាតិឡើងវិញ។
លទ្ធផលការដាំដើមឈើចាប់តាំងពីឆ្នាំ២០១០ ដល់២០២២ អាជ្ញាធរជាតិព្រះវិហារបានដាំកូនឈើ ២៦ប្រភេទសរុបចំនួន៨១៩៩៦ដើម នៅទីតាំងរេចរិលជាង ៥០ហិកតាក្នុងតំបន់ការពារទី២ និងទីតាំងសាធារណៈសំខាន់ៗផ្សេងទៀតរួមមាន តាមដងផ្លូវ វត្ដអារាម និងសាលារៀន។ លើសពីនេះ ការកាត់សម្អាតស្មៅការពារកូនឈើ ការធ្វើសុវុឌ្ឍិកម្មព្រៃឈើ និងការធ្វើផ្លូវភ្លើង ដើម្បីបញ្ចៀសភ្លើងព្រៃ បានអនុវត្ដជារៀងរាល់ឆ្នាំ ដើម្បីការពារកូនឈើដែលដាំ និងកូនឈើធម្មជាតិរាប់ម៉ឺនដើម។ មិនត្រឹមតែប៉ុណ្ណោះ អាជ្ញាធរជាតិព្រះវិហារបានអប់រំផ្សព្វផ្សាយដល់សិស្សានុសិស្ស និងប្រជាសហគមន៍ពីគុណតម្លៃព្រៃឈើដើម្បីបញ្ជា្រប បណ្តុះស្មារតីរបស់ពួកគាត់ឲ្យចេះស្រលាញ់ និងចូលរួមការពារបរិស្ថាន។
