ប្រាសាទក្រចាប់បានសាងសង់ដោយព្រះបាទជ័យវ័រ្មនទី៤ ស.វ.ទី១០ ឆ្នាំ៩២៨គ.ស អំពីឥដ្ឋ ថ្មភក់ និងថ្មបាយក្រៀម។ នៅក្នុងតួប៉មកណ្តាលមានតម្កល់រូបចម្លាក់ជាច្រើនដូចជា ព្រះឥសូរនិងព្រះស្កន្ទ ព្រះស្កន្ទគង់លើសត្វក្ងោក បដិមាអឌ្ឍនារីស្វរៈ បដិមាកិន្នរី និងបដិមាផ្សេងៗទៀតដែលជារូបចម្លាក់ដ៏ល្អវិចិត្រក្នុងចំណោមបដិមាស្ថិតក្នុងរចនាបទកោះកេរ។ បដិមាទាំងនោះ ត្រូវបានលួចជីកគាស់កកាយយកចេញពីទីតាំងដើមយកទៅលក់នៅក្រៅប្រទេស។ អាជ្ញាធរជាតិព្រះវិហារបានធ្វើកំណាយស្រាវជ្រាវប្រមូលទិន្នន័យពាក់ពន្ធ័នឹងបដិមាទាំងនោះ ដើម្បីផ្ទៀងផ្ទាត់គ្នាជាមួយបដិមាដែលបានលួចចេញ និងទាមទារមកវិញ។ ចាប់ពីឆ្នាំ២០២០ ដល់២០២៣ មន្ត្រីអាជ្ញាធរជាតិព្រះវិហារបានដឹកនាំធ្វើកំណាយស្រាវជ្រាវបុរាណវិទ្យាចំនួន ៥លើក។
គោលបំណងនៃកំណាយស្រាវជ្រាវប្រាសាទក្រចាប់គឺដើម្បីស្រាវជ្រាវរកបំណែកបដិមាដែលបាត់បង់ និងដើម្បីការងារអភិរក្សប្រាសាទនេះ ពីព្រោះតួប៉មប្រាសាទឥដ្ឋទាំងប្រាំបានដួលរលំ នៅសល់ត្រឹមពាក់កណ្តាល ហើយដី និងគំនរឥដ្ឋបានចាក់បង្គរក្នុងបរិវេណប្រាសាទកំពស់ប្រហែលពី១៥០ ទៅ២០០ស.ម។
លទ្ធផលកំណាយលើកទី១៖ ក្នុងរណ្តៅទំហំ ៣ម x ២,៦០ម ពីថ្ងៃទី៣ ដល់ទី៤ ខែតុលា ឆ្នាំ២០២០ នៅក្នុងតួប៉ម កណ្តាល PKK13.01 គឺបានរកឃើញបដិមាស្រីអង្គុយបីកូន បំណែកដៃឆ្វេងព្រះស្កន្ទ បំណែកព្រះកេស បំណែកកុលាលភាជន៍ ឥដ្ឋ និងបំណែកថ្មភក់តូចធំសរុបចំនួន ២២៩បំណែក។
លទ្ធផលកំណាយលើកទី២៖ ចាប់ផ្តើមអនុវត្តន៍ធ្វើកំណាយពីថ្ងៃទី២១ ខែតុលា ដល់ថ្ងៃទី៣១ ឆ្នាំ២០២០ នៅមណ្ឌបខាងមុខតួប៉មកណ្តាល បានរកឃើញបំណែកទងត្រចៀកព្រះឥសូរ ជើងទម្របដិមា បំណែកគ្រឿងបង្គុំសំណង់ និងបំណែកកុលាលភាជន៍រឹង សរុបចំនួន ២៨៦១ បំណែក។
លទ្ធផលកំណាយលើកទី៣៖ ចាប់អនុវត្តពីថ្ងៃទី០១ ដល់ថ្ងៃទី៣១ ខែវិច្ឆិកា ឆ្នាំ២០២០ យើងបានប្រមូលបំណែកគ្រឿងបង្គុំសំណង់ប្រាសាទ បំណែកកុលាលភាជន៍ បំណែកបដិមា និងសន្លឹកមាសពីរសន្លឹក សរុបចំនួន ៧៦បំណែក។
លទ្ធផលកំណាយលើកទី៤៖ កំណាយបានអនុវត្តន៍ចាប់ផ្តើមពីថ្ងៃទី០៧ ខែមីនា ដល់ថ្ងៃទី៣១ ខែឧសភា ឆ្នាំ២០២២ បានរកឃើញបំណែកជើងទម្របដិមាកិន្នរី៣បំណែក បល្ល័ង្កបដិមារាងបួនជ្រុងមានក្បាច់ត្របកឈូកចំនួន៣ នៅតាមជ្រុងខឿនតួប៉មកណ្តាល និងបំណែកថ្មភក់ផ្សេងៗទៀត។
លទ្ធផលកំណាយលើកទី៥៖ កំណាយបានអនុវត្តន៍ចាប់ពីថ្ងៃទី២៣ ខែវិច្ឆិកា ឆ្នាំ២០២២ ដល់ខែមិថុនា ឆ្នាំ២០២៣ នៅទីតាំងផ្នែកខាងមុខតួប៉មកណ្តាល ស្ថិតនៅចន្លោះតួប៉មជ្រុងនារតី និងពាយ័ព្យ។ កំណាយនេះបានរកឃើញបំណែកថ្មភក់សរុបចំនួន១៦៧៦០បំណែក ដែលភាគច្រើនជាបំណែកគ្រឿងបង្គុំសំណង់ប្រាសាទ បំណែកជើងទម្របដិមា បល្ល័ង្ក និងបំណែកថ្មតូចៗ។ ចំណែក បំណែកកុលាលភាជន៍សរុបចំនួន ១០១៦បំណែក។ បំណែកសំខាន់ៗរួមមានបំណែកបល្ល័ង្កព្រះស្កន្ទ បំណែកពន្លួញ និងប្រអប់ជើងបដិមាតូច ហោជាងមានរូបគជលក្ស្មី បំណែកព្រះស្កន្ទេជិះក្ងោក ផ្តែរ និងចម្លាក់តោ។
កំណាយទាំង៥ដំណាក់កាលខាងលើ បានរកឃើញវត្ថុសិល្បៈសំខាន់ៗដូចជា៖ ប្រអប់ជើងបដិមា បំណែកសិលាចារឹក បំណែកពន្លួញបដិមា បំណែកបល្ល័ង្ក បំណែកបល្ល័ង្កព្រះស្កន្ទ បំណែកភ្នួងសក់បដិមា សសរពេជ ហោជាង ផ្តែរ និងចម្លាក់តោ។ ជាពិសេស បានរកឃើញបំណែកបដិមាមួយចំនួន ដែលបានលួចចេញពីប្រាសាទនេះ។ សរុបមក បំណែកថ្មភក់ទាំងអស់មានចំនួន ២៦៧០០បំណែក និងបំណែកកុលាលភាជន៍សរុបមានចំនួន ៥០០០បំណែក។
