ជណ្ដើរបុរាណខាងជើងប្រាសាទព្រះវិហារមានប្រវែង ១១១ម៉ែត្រ ទទឹង ១១ម៉ែត្រ និងកម្ពស់ ៣៩ម៉ែត្រ។ បច្ចុប្បន្នជណ្តើរនេះបានទទួលរងការខូចខាតយ៉ាងខ្លាំង ដោយសារប្រព័ន្ធបង្ហូរទឹកបុរាណ នៅសងខាងជណ្តើរបានកកស្ទះ បាត់បង់តួនាទី និងគ្មានការថែទាំ ធ្វើឱ្យទឹកភ្លៀងហូរចូលទៅក្នុងបរិវេណជណ្តើរ ហើយឬសឈើក៏បានដុះចាក់ចូលបំផ្លាញគ្រឹះជណ្តើរ។
គោលបំណងនៃការស្តារប្រព័ន្ធបង្ហូរទឹកបុរាណអោយមានតួនាទីឡើងវិញ គឺជាផ្នែកមួយសំខាន់ក្នុងចំណោមការងារអភិរក្ស និងលើកតម្លៃហេដ្ឋារចនាសម្ព័ន្ធប្រព័ន្ធបង្ហូរទឹកបុរាណ។
លទ្ធផលទទួលបានពីកំណាយស្រាវជ្រាវពីថ្ងៃទី១ ដល់៣០ ខែកញ្ញា ឆ្នាំ២០១៧ នៅទីតាំងចំនួន ២គឺ៖ រណ្តៅទី០១ សិ្ថតនៅខាងលិចជណ្តើរបង្ហាញពីការបុកបង្ហាប់ដីខ្សាច់លាយជាមួយកំទេចថ្មភក់ធ្វើគ្រឹះ ហើយរៀបថ្មភក់មួយជាន់ពីលើដើម្បីជួយទប់ពង្រឹងគ្រឹះជណ្តើរបន្ថែម។ រណ្តៅកំណាយទី០២សិ្ថតនៅខាងកើតជណ្តើរ បង្ហាញពីការដាប់ផ្ទាំងថ្មភ្នំធម្មជាតិធ្វើជាប្រព័ន្ធបង្ហូរទឹកស្របជាមួយជណ្តើរ។
