ប្រាសាទធំជាបណ្តុំប្រាសាទមួយក្នុងចំណោមប្រាសាទសរុបចំនួន៧៦ ដែលមានវត្តមាននៅរមណីយដ្ឋានប្រាសាទកោះកេរ។ ភ្ញៀវជាតិ និងភ្ញៀវអន្តរជាតិតែងតែស្គាល់ប្រាសាទធំ ឬប្រាសាទកោះកេរនេះជាងគេ ដោយសារភាពអស្ចារ្យសំណង់ស្ថាបត្យកម្ម និងសិល្បៈនៅទីនោះ។
គោលបំណងដើម្បីបង្កលក្ខណៈងាយស្រួល និងមានសុវត្ថិភាពដល់ភ្ញៀវជាតិ និងភ្ញៀវអន្តរជាតិចូលទស្សនាក្នុងបរិវេណប្រាសាទធំនេះ ក្រុមការងាររបស់អាជ្ញាធរជាតិព្រះវិហារបានស្ថាបនាជណ្តើរឈើ និងកម្រាលផ្លូវដើរឈើចាប់ពីប្រាសាទគុក ដល់ផ្នូរស្តេចដំរីស បានស្ថាបនាផ្លូវថ្មើរ ជើងជុំវិញប្រាសាទប្រាង្គ និងបានជួសជុលជណើ្តរឈើឡើងប្រាសាទប្រាង្គ ដែលជាប្រាសាទរាងជាពីរ៉ាមីត កម្ពស់៣៥ម៉ែត្រ ចាប់តាំងពីឆ្នាំ២០១៦ ដល់២០២៣។
លទ្ធផលការងារទទួលបានមានដូចខាងក្រោម៖
- បានស្ថាបនាជណ្តើរ និងកម្រាលឈើថ្មីមានចំនួនសរុប ១១ទីតាំង ចាប់ពីប្រាសាទគុកទៅដល់ផ្នូរស្តេចដំរីស និងបានថែទាំជាប្រចាំរហូតដល់បច្ចុប្បន្ន។
- បានរៀបចំ និងស្ថាបនាផ្លូវថ្មើរជើង និងបង្គោលរបាអមសងខាងសម្រាប់ភ្ញៀវទេសចរមកទស្សនាប្រាសាទប្រាង្គ ដែលមានប្រវែងសរុប ៣២០ម៉ែត្រ គុណ ២ម៉ែត្រ។
បានជួសជុលជណ្តើរឈើឡើងប្រាសាទប្រាង្គ និងស្ថាបនារបាសុវត្ថិភាពទៅតាមថ្នាក់និមួយៗនៃពីរ៉ាមីត ដែលមានប្រវែងសរុប១០០ម៉ែត្រ គុណ ១.២ម៉ែត្រ។
