ព័ត៌មានទូទៅ

ថ្ងៃសៅរ៍ ១៣ រោច ខែមិគសិរ ឆ្នាំរោង ឆស័ក.ពស ២៥៦៨ ត្រូវនឹងថ្ងៃទី២៨ ខែធ្នូ ឆ្នាំ២០២៤ អាជ្ញាធរជាតិព្រះវិហារ បានសហការជាមួយអ្នកគ្រូ Anello Barbara លោកគ្រូ-អ្នកគ្រូ និងគរុនិស្សិតឆ្នាំទី៤មកពីវិទ្យាស្ថានគរុកោសល្យរាជធានីភ្នំពេញ (PTEC) រៀបចំកម្មវិធីចែករំលែក ចំណេះដឹងគរុកោសល្យដល់លោកគ្រូ អ្នកគ្រូមកពី សាលាបឋមសិក្សាកោះកេរ តាប្រា និងរំចេកស្ថិតក្នុងរមណីយដ្ឋានប្រាសាទកោះកេរ ដើម្បីបង្កើនទេពកោសល្យបង្រៀនដល់សិស្សានុសិស្ស។ កម្មវិធីនេះមានអ្នកចូលរួមសរុបចំនួន៣២នាក់ ដឹកនាំដោយ ឯកឧត្តម ភិន សំណាង ប្រធាននាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ តំណាងឱ្យឯកឧត្តមអគ្គនាយកអាជ្ញាធរជាតិព្រះវិហារ និងអ្នកគ្រូ Anello Barbara។ គោលបំណងកម្មវិធីនេះ ដើម្បីបន្ថែមនូវចំណេះដឹងតាមរយៈបទបង្ហាញដល់លោកគ្រូ អ្នកគ្រូ សំខាន់ៗរួមមាន÷

១.កិច្ចតែងការបង្រៀន

២. ការគ្រប់គ្រងថ្នាក់រៀន

៣. ការលេងល្បែងកម្សាន្ត

៤. ទំនាក់ទំនងរវាងគ្រូ និងអាណាព្យាបាល

៥. ការវាយតម្លៃសមត្ថភាពសិស្ស

៦. តួនាទីសារមន្ទីរ បេតិកភណ្ឌវប្បធម៌ និងសិល្បៈក្នុងការអប់រំ

កម្មវិធីនេះក៏រួមមានការចែកសម្ភារៈសិក្សាដល់សាលាបឋមសិក្សាទាំង៣នៅក្នុងរមណីយដ្ឋានប្រាសាទកោះកេរផងដែរ។