Tuesday, August 19, 2025
លោកជំទាវ ហ៊ុន ម៉ាណា អគ្គនាយិកាទូរទស្សន៍បាយ័ន អញ្ជើញទស្សនកិច្ចសារមន្ទីរធម្មជាតិសកលសម្តេចតេជោ ហ៊ុនសែន ព្រះវិហារ និងសួរសុខទុក្ខពលករ ភ្នាក់ងារទេសចរ ប្រចាំរមណីយដ្ឋានប្រាសាទព្រះវិហារ
នៅព្រឹកថ្ងៃទី១៩ ខែសីហា ឆ្នាំ២០២៥នេះ លោកជំទាវ ហ៊ុន ម៉ាណា អគ្គនាយិកាទូរទស្សន៍បាយ័ន បានដឹកនាំប្រតិភូអញ្ជើញទស្សនកិច្ចសារមន្ទីរធម្មជាតិសកលសម្តេចតេជោ ហ៊ុន សែន ព្រះវិហារ និងចុះសួរសុខទុក្ខពលករ ភ្នាក់ងារទេសចរ នៃអាជ្ញាធរជាតិព្រះវិហារ បម្រើការនៅរមណីយដ្ឋានប្រាសាទព្រះវិហារ ដែលជាប់គាំងនៅលើប្រាសាទព្រះវិហារ ក្នុងអំឡុងពេលសង្រ្គាមឈ្លានពានរបស់កងទ័ពថៃ កាលពីថ្ងៃទី២៤ ខែកក្កដា ឆ្នាំ២០២៥កន្លងទៅ។ ក្នុងឱកាសនោះលោកជំទាវ ក៏បានសម្តែងនូវមរណៈទុក្ខដ៏ក្រៀមក្រំចំពោះការពលីរបស់វីរៈកងទ័ពកម្ពុជា ដែលបានលះបង់សាច់ឈាមស្រស់ក្នុងសមរភូមិប្រយុទ្ធតតាំងជាមួយសត្រូវឈ្លានពានសៀមមកលើបូរណៈភាពទឹកដីរបស់កម្ពុជា។
ឈ្លាតឱកាសសំណេះសំណាលនោះដែរ លោកជំទាវក៏បានពាំនាំនូវប្រសាសន៍ផ្តាំផ្ញេីសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចគិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានិងលោកជំទាវបណ្ឌិត ពេជ ចន្ទមុន្នី សូមជូនពរដល់ពលករ ភ្នាក់ងារទេសចរ សន្តិអភិរក្សរបស់អាជ្ញាធរជាតិព្រះវិហារមានសុខភាពល្អទាំងអស់គ្នា ដេីម្បីបម្រេីការងារជូនជាតិ និងការពារបេតិកភណ្ឌជូនជាតិយេីងបន្តទៅមុខទៀត។
ជាមួយគ្នានោះលោកជំទាវក៏បានឧបត្ថម្ភថវិកានិងគ្រឿងឧបភោគបរិភោគភ្នាក់ងារទេសចរ ពលករ បរិស្ថានុរក្ស និងពលករជំនាញជួសជុលប្រាសាទចំនួន៤៥នាក់ ដែលជាប់គាំងលើភ្នំប្រាសាទព្រះវិហារ ក្នុងអំឡុងពេលសង្រ្គាម ក្នុងម្នាក់ៗទទួលបាន អង្គរ១បាវ ទឹកត្រី១យួរ ឃីដ១ និងថវិកា១លានរៀល និងបុគ្គលិកចំនួន៤៥នាក់ទៀត ថវិកា៥០ម៉ឺនរៀល ព្រមទាំងឧបត្ថម្ភថវិកាមួយចំនួនដល់អាជ្ញាធរជាតិព្រះវិហារផងដែរ។
