ប្រាសាទតូចស្ថិតនៅផ្នែកខាងត្បូងនៃបារាយណ៍គ១ ប្រហែល៣០០ម៉ែត្រ បានបែកបាក់ផ្នែកខ្លះធ្លាក់ចេញពីទីតាំងដើម ហើយផ្នែកខ្លះបានដួលរលំទៅហើយ។ លើសពីនោះ វត្ថុសិល្បៈខ្លះត្រូវបាន ចល័តពីទីតាំងមួយទៅទីតាំងមួយទៀត ដោយការរស់នៅរបស់ប្រជាជនក្នុងអំឡុងឆ្នាំ២០០០ និងវត្ថុខ្លះ ទៀតត្រូវបានបំផ្លាញ នៅក្នុងសម័យសង្គ្រាម។
គោលបំណងការចុះបញ្ជីសារពើភណ្ឌវត្ថុសិល្បៈនៅប្រាសាទតូច គឺដើម្បីដឹងចំនួនវត្ថុ និងកំណត់អត្តសញ្ញាណរាល់វត្ថុសិល្បៈ ដែលធ្លាក់បាក់បែកនៅរាយប៉ាយ ចងក្រងឯកសារ និងរៀបចំផែនការអភិរក្ស។
លទ្ធផលទទួលបានពីការចុះបញ្ជីសារពើភណ្ឌវត្ថុសិល្បៈប្រាសាទតូចដែលបានអនុវត្ត នៅថ្ងៃទី១៣ ខែមីនា ឆ្នាំ២០១៦ មានចំនួន១៤បំណែកដូចជា៖ បំណែកកញ្ចាំងនាគចំនួន៥ដុំ ថ្មកំពូលប្រាសាទចំនួន១ដុំ បំណែកជើងទម្រចំនួន១ដុំ បំណែកដុំថ្មមានចម្លាក់ទេវរូបចំនួន១ដុំ បំណែកហោជាងចំនួន២ដុំ បំណែកផ្តែរចំនួន៣ដុំ និងបំណែកស្លឹករការចំនួន១ដុំ។ ការចុះបញ្ជីវត្ថុសិល្បៈគឺធ្វើតែវត្ថុនៅផ្ទៃខាងលើប៉ុណ្ណោះ។ វត្ថុសិល្បៈកប់ក្នុងដី និងក្រោមគំនរថ្មនឹងបន្តធ្វើនៅពេលក្រោយទៀត។ វត្ថុសិល្បៈដែលបានចុះបញ្ជីរួច គឺបានយកទៅរក្សាទុកនៅសារមន្ទីរធម្មជាតិសាកល សម្ដេចតេជោ ហ៊ុន សែន ព្រះវិហារ។
