បន្ទាប់ពីសិក្សាផែនទីហានីភ័យ និងទល់ទ្រផ្នែកខ្លះនៃរចនាសម្ព័ន្ធប្រាសាទ ដែលប្រឈម គ្រោះថ្នាក់ការដាក់ឧបករណ៍តាមដានការប្រែប្រួលប្រាសាទនៅតាមទីតាំង ដែលថ្មញែកចេញពីគ្នា គឺជារឿងចាំបាច់។ គោលបំណងនៃដាក់ឧបករណ៍តាមដានការបម្រែបម្រួលនៃរចនាសម្ព័ន្ធប្រាសាទគឺ ដើម្បីដឹងពីចលនារបស់សំណង់ ហើយរកវិធានការណ៍ទប់ស្កាត់គ្រោះមហន្តរាយជាបន្ទាន់ឱ្យទាន់ពេលវេលា។ ចាប់ឆ្នាំ២០០៨មក ក្រុមការងារនាយកដ្ឋានអភិរក្ស និងបុរាណវិទ្យាបានដាក់ឧបករណ៍តាមដានការប្រែប្រួលប្រាសាទព្រះវិហារចំនួន១៥ទីតាំង។ ក្នុងនោះមាននៅពើយតាឌីចំនួន១ទីតាំង នៅគោបុរៈទី១ ចំនួន៣ទីតាំង នៅគោបុរៈ ទី២ ចំនួន១ទីតាំង នៅគោបុរៈទី៣ ចំនួន៤ទីតាំង នៅគោបុរៈទី៤ ចំនួន៤ទីតាំង នៅគោបុរៈទី៥ ចំនួន១ទីតាំង និងនៅក្បាលនាគចំនួន១ទីតាំង។
