ប្រវត្តិសង្ខេប
ឯកឧត្ដម គង់ ពុទ្ធិការ កើតនៅឆ្នាំ១៩៨០។ ឯកឧត្ដម បានទទួលបរិញ្ញាប័ត្រគ្រប់គ្រង ពីវិទ្យាស្ថានជាតិគ្រប់គ្រង នៅឆ្នាំ២០០១ និងទទួលបានបរិញ្ញាប័ត្រអប់រំភាសាអង់គ្លេស ពីវិទ្យាស្ថានភាសាបរទេស នៃសាកលវិទ្យាល័យ ភូមិន្ទភ្នំពេញ នៅឆ្នាំ២០០២។ នៅឆ្នាំ២០០៧ ឯកឧត្ដម បានទទួលបរិញ្ញាបត្រជាន់ខ្ពស់ផ្នែកគោលនយោបាយ សហប្រតិបត្តិការអន្តរជាតិ ពីសាកលវិទ្យាល័យ Ritsumeikan Asia Pacific ប្រទេសជប៉ុន។
នៅឆ្នាំ២០០៣ ឯកឧត្ដម បានចាប់ផ្តើមការងារជាមន្ត្រីរាជការនៅអាជ្ញាធរជាតិទេសចរណ៍ និងក្រោយមកនៅនាយកដ្ឋានបុគ្គលិក នៃទីស្ដីការគណៈរដ្ឋមន្ត្រី។ នៅឆ្នាំ២០០៨ ឯកឧត្ដម បានទទួលភារកិច្ចនៅក្នុងក្រុមការងារពិសេសថ្នាក់ជាតិតំបន់ប្រាសាទព្រះវិហារ នៃទីស្ដីការគណៈរដ្ឋមន្ត្រី ផ្តោតលើបេសកកម្មរៀបចំកិច្ចការអភិវឌ្ឍន៍ និងអភិរក្សនៅរមណីយដ្ឋានប្រាសាទព្រះវិហារ។ នៅឆ្នាំ២០១២ ឯកឧត្ដម ត្រូវបានតែងតាំងជាប្រធាននាយកដ្ឋានអភិវឌ្ឍន៍ទេសចរណ៍តំបន់ប្រាសាទព្រះវិហារ ហើយនៅឆ្នាំ២០១៥ ឯកឧត្ដម ក៏ត្រូវបានតែងតាំងជា អគ្គនាយកនៃអាជ្ញាធរជាតិព្រះវិហារ ទទួលបន្ទុកដឹកនាំកិច្ចការអភិរក្ស និងអភិវឌ្ឍន៍នៅក្នុងរមណីយដ្ឋានប្រាសាទព្រះវិហារ និងរមណីយដ្ឋាន ប្រាសាទកោះកេរ។ នៅឆ្នាំ២០១៩ ឯកឧត្តម បានដឹកនាំការងាររៀបចំឯកសារស្នើសុំចុះរមណីយដ្ឋានប្រាសាទកោះកេរ ក្នុងបញ្ជីបេតិកភណ្ឌពិភពលោក ដែលត្រូវបានចុះបញ្ជីនៅខែកញ្ញា ឆ្នាំ២០២៣។
