ប្រវត្តិសង្ខេប

ឯកឧត្តម ឃូ អៀងហួត កើតនៅឆ្នាំ១៩៧៥។ គាត់ទទួលបានបរិញ្ញាបត្រផ្នែកវិទ្យាសាស្រ្តព្រៃឈើនៅសាកលវិទ្យាល័យភូមិន្ទ​កសិកម្មភ្នំពេញក្នុងឆ្នាំ១៩៩៨ ហើយបានបន្តថ្នាក់បរិញ្ញាបត្រជាន់ខ្ពស់ផ្នែករុក្ខវិទ្យា​នៅសាកលវិទ្យាល័យជាតិឡេដិន ប្រទេស​ហូឡង់​នៅឆ្នាំ២០០៤។ ឯកឧត្តមបានចូលរៀននៅក្នុងវគ្គជំនាញខ្លីៗ​ជាច្រើនទៀតដូចជា ដើមឈើវិទ្យា ការវាយតម្លៃផលប៉ះ​ពាល់​បរិស្ថាន ការគ្រប់គ្រងគ្រោះមហន្តរាយ សេវាកម្ម​ស្ថានប្រព័ន្ធ ការវាយតម្លៃប្រភេទរុក្ខជាតិរងការគម្រាម កំហែងចូលក្នុងបញ្ជី​ក្រហម IUCN ផលប៉ះពាល់ពី​ការប្រែប្រួលអាកាសធាតុលើរុក្ខជាតិ និងប្រភេទរុក្ខជាតិពិសេស។

ក្រោយចេញពីមហាវិទ្យាល័យក្នុងឆ្នាំ១៩៩៨ ឯកឧត្តមបានចូលបម្រើការងារនៅក្រសួងបរិស្ថាន ដោយផ្តោតការងារលើជំនាញ​រុក្ខវិទ្យា អេកូឡូស៊ីព្រៃឈើ និងគ្រប់គ្រងធនធានធម្មជាតិ។ នៅចុងឆ្នាំ២០០៨ លោកបានប្តូរទៅធ្វើការនៅអាជ្ញាធរជាតិ​ព្រះវិហារ ក្រសួងវប្បធម៌ និងវិចិត្រសិល្បៈ ដោយពេលនោះបានតម្លើង​ឋានៈជាអនុប្រធាននាយកដ្ឋាន​បរិស្ថាន ព្រៃឈើ និងទឹក។ នៅឆ្នាំ២០១៣ ឯកឧត្តមត្រូវបានតម្លើងជាប្រធាន​នាយកដ្ឋានបរិស្ថាន ព្រៃឈើ និងទឹក។ បច្ចុប្បន្ននេះ ឯកឧត្តមមាន​តួនាទីជាអគ្គនាយករងនៃអាជ្ញធរជាតិ​ព្រះវិហារ​។