រមណីយដ្ឋានប្រាសាទកោះកេរ គ្របដណ្តប់ដោយព្រៃល្បោះ ដែលតំណាងឲ្យស្ថានប្រព័ន្ធព្រៃស្ងួតនៅភាគឧត្តរប្រទេសកម្ពុជា។ ក្រៅពីនេះរមណីយដ្ឋាននេះក៏មានប្រភេទព្រៃផ្សេងៗទៀតដែលដុះជាដុំៗដូចជា ព្រៃតាមមាត់ទឹក ព្រៃឬស្សី និងវាលស្មៅ។
គោលបំណងការសិក្សាព្រៃឈើ គឺដើម្បីកំណត់អត្តសញ្ញាណ និងចងក្រងប្រភេទឈើដែលមានក្នុងតំបន់រមណីយដ្ឋាន ដងស៊ីតេឈើតាមប្រភេទព្រៃ និងរៀបផែនការដាំស្ដារព្រៃឈើឡើងវិញ។
ជាលទ្ធផល បញ្ជីឈ្មោះរុក្ខជាតិចំនួន ២០៦ប្រភេទ បានកត់ត្រាក្នុងប្រព័ន្ធទិន្នន័យរុក្ខជាតិ និងស្លាកឈ្មោះដើមឈើចំនួន៥៦ស្លាក ត្រូវបានដាក់នៅតាមប្រាសាទចំនួន៦ និងអណ្តូងព្រេង ដើម្បីឲ្យភ្ញៀវទេសចរស្គាល់ឈ្មោះរុក្ខជាតិក្នុងតំបន់។ ការស្រាវជ្រាវពីដង់ស៊ីតេឈើធម្មជាតិ បង្ហាញថា ក្នុងព្រៃល្បោះលប់ជាមធ្យមក្នុងមួយហិកតា មានដើមឈើអង្កត់ផ្ចិតចាប់ពី១០សមឡើងទៅ មានចំនួន៣៨៧ដើម និងកូនឈើ ចំនួន៧១២៥ដើម និងព្រៃល្បោះចម្រុះមានដើមឈើ ចំនួន៣៨២ដើម និងកូនឈើចំនួន ៥៧៥០ដើម។
