ដើមឈើធំៗដែលដុះតាមប្រាសាទ និងតាមដងផ្លូវសំខាន់ ក្នុងរមណីយដ្ឋានប្រាសាទកោះកេរ បានជួយលើកសោភ័ណភាព និងទេសភាពដ៏ស្រស់បំព្រង។ ដោយឡែកដើមឈើមួយចំនួនក៏អាចបង្ករហានិភ័យដល់ប្រាសាទ និងទីសាធារណៈ។
គោលបំណង គ្រប់គ្រងហានិភ័យដើមឈើ និងលើកកម្ពស់សោភ័ណភាព គឺដើម្បីបញ្ចៀសគ្រោះមហន្តរាយដល់ប្រាសាទ ភ្ញៀវទេសចរ និងលើកកម្ពស់សោភ័ណភាព នៅតំបន់រមណីយដ្ឋានប្រាសាទកោះកេរ។
ជាលទ្ធផល ដើមឈើដែលមានហានិភ័យខ្ពស់ និងដើមឈើដួលរលំត្រូវបានដកហូត កាត់ក្រីមែកនៅទីតាំងសំខាន់ៗដូចជា ប្រាសាទ អណ្តូងព្រេង រហាល ក្នុងភូមិ សាលារៀន និងតាមដងផ្លូវចូលរមណីយដ្ឋានប្រាសាទកោះកេរ។ ដើមឈើសរុបចំនួន៤២៩ដើមត្រូវបានសិក្សា និងវាយតម្លៃពីកម្រិតហានិភ័យ។ ដើមឈើដែលមានកម្រិតហានិភ័យខ្ពស់ចំនួន៥៤ដើម ត្រូវបានដកហូតជាបន្តបន្ទាប់។ ដោយឡែកដើមឈើ ដែលមានហានិភ័យមធ្យមចំនួន១៣០ដើម និងដើមឈើមានហានិភ័យទាបចំនួន២៤៥ដើមទៀតស្ថិតក្រោមការឃ្លាំមើលជាប្រចាំ។ ក្រៅពីនេះការសម្អាតរុក្ខជាតិក្នុងទឹករួមមានពើក ចក និងសារាយក្នុងកសិន្ធុបុរាណនៅរមណីយដ្ឋានប្រាសាទកោះកេរបានអនុវត្ដជាប្រចាំ ដើម្បីថែរក្សាសោភ័ណភាពកសិន្ធុ និងគុណភាពទឹក។
