វិស័យអប់រំជាវិស័យសំខាន់បំផុតសម្រាប់អភិវឌ្ឍប្រទេសជាតិមួយទៅមុខឲ្យបានល្អប្រសើរ។ អាជ្ញាធរជាតិព្រះវិហារ បានយកចិត្តទុកដាក់ចូលរួមអនុវត្តន៍គម្រោងលើកកម្ពស់វិស័យអប់រំជាមួយក្រសួងអប់រំ យុវជន និងកីឡា នៅតាមសាលាក្នុងសហគមន៍។
គោលបំណងការលើកកម្ពស់វិស័យអប់រំតាមសាលារៀនក្នុងសហគមន៍នេះ គឺដើម្បីផ្តល់នូវចំណេះបន្ថែមដល់សិស្សានុសិស្សឲ្យយល់ដឹងពីមូលដ្ឋានខ្លះនៃការងារដាំដុះ និងបណ្តុះស្មារតីឲ្យស្រលាញ់បរិស្ថានស្អាតក្នុងសាលារៀន ក៏ជាបរិស្ថានស្អាតនៅក្នុងភូមិរបស់ខ្លួន។
លទ្ធផលទទួលបានច្រើនឆ្នាំកន្លងមកនេះគឺ ក្រុមការងារបានខិតខំរួមចំណែកលើកកម្ពស់ការយល់ដឹងលើមុខវិជ្ជាអប់រំសួនបំណិនជីវិតមូលដ្ឋានស្របតាមកម្មវិធីរបស់ ក្រសួងអប់រំ យុវជន និងកីឡា។ លើសពីនេះ ក្រុមការងារបានផ្តល់នូវបង្គន់អនាម័យ កង់ សូទែនស្តុបទឹក របងព័ទ្ធជុំវិញសួនបន្លែ ក្នុងសាលារៀន ប្រព័ន្ធទុយោទឹក សម្ភារៈកសិកម្ម គ្រាប់ពូជបន្លែ កូនឈើហូបផ្លែ និងសម្ភារៈសិក្សាដល់សាលារៀនចំនួន៣ មានដូចជា អនុវិទ្យាល័យហ៊ុនសែនស្រះក្តុល វិទ្យាល័យខេមរៈតេជោ និងសាលាបឋមសិក្សាតេជោធម្មជាតិ។ ជាមួយគ្នានេះ ក្រុមការងារបានជួយរៀបចំបណ្ណាល័យរួមមួយ និងជួយឧបត្តម្ភសម្ភារៈចាំបាច់ដូចជា ទូសៀវភៅ តុ កៅអី និងសៀវភៅអាន សៀវភៅសរសេរដល់អនុវិទ្យាល័យហ៊ុនសែនស្រះក្តុល។
ក្រៅពីនោះ ក្រុមការងារបានបង្រៀនភាសាអង់គ្លេសបន្ថែមម៉ោងដល់សិស្សានុសិស្សចំនួន៤៥០នាក់ នៅអនុវិទ្យាល័យហ៊ុនសែនស្រះក្តុល វិទ្យាល័យខេមរៈតេជោ និងវិទ្យាល័យស្រអែម និងបានបង្រៀនភាសារអង់គ្លេសក្រៅប្រព័ន្ធបន្ថែមនៅភូមិធម្មជាតិដល់កុមារក្រីក្រសរុបមាន៨០នាក់ ត្រូវជា៩វគ្គ ដោយក្នុងមួយវគ្គៗ មានរយៈពេលសិក្សា៣ខែ។
