ការលើកកម្ពស់វិស័យអប់រំ ត្រូវដាក់ចូលជាកម្មវិធីផែនការអត្ថិភាពចម្បងមួយនៃគោលនយោបាយរបស់រាជរដ្ឋាភិបាលកម្ពុជាក្នុងការលើកកម្ពស់ចំណេះដឹង និងបង្កើនធនធានមនុស្សដើម្បីអភិឌ្ឍន៍ជាតិទៅថ្ងៃខាងមុខ។ តាមរយៈយន្តការនេះ អាជ្ញាធរជាតិព្រះវិហារបានចូលរួមចែករំលែកការបណ្តុះបណ្តាល និងកម្មវិធីមួយចំនួនដូចជា កម្មវិធីបំប៉ន់ភាសាអង់គ្លេសតាមសាលា កម្មវិធីផ្តល់បច្ចេកទេសកសិកម្ម និងកម្មវិធីរៀបចំសួនបំណិនជីវិតនៅតាមសាលារៀនក្នុងសហគមន៍នៅរមណីយដ្ឋានប្រាសាទកោះកេរ។
គោលបំណងសំខាន់គឺ (១) ចូលរួមបណ្តុះបណ្តាលបន្ថែមលើជំនាញភាសាអង់គ្លេសដល់សិស្សានុសិស្សនៅតាមសាលា និងរៀបចំសួនបំណិនជីវិតរបស់ពួកគាត់តាមរយៈការដាំដុះដំណាំបន្លែបង្ការប្រចាំថ្ងៃដោយផ្ទាល់ និង(២) ចុះផ្សព្វផ្សាយ ចែកពូជ និងបណ្តុះបណ្តាលបច្ចេកទេសកសិកម្មដល់គ្រួសារបងប្អូនកសិករនៅក្នុងសហគមន៍ ។
លទ្ធផលទទួលបានអនុវត្តកន្លងមកតាំងពីឆ្នាំ២០១៦ មកទល់ឆ្នាំ២០២២ មានដូចតទៅ៖ (១) បានបង្រៀនបំប៉នបន្ថែមភាសាអង់គ្លេសដល់សិស្សានុសិស្សនៅសាលាបឋមសិក្សាពីរកន្លែងក្នុងភូមិកោះកេរ និងភូមិរំចេកបាន ៤ថ្នាក់ ដែលមានសិស្សសរុប ១៩០នាក់ (២) បានផ្តល់បច្ចេកទេសកសិកម្មដល់លោកគ្រូ-អ្នកគ្រូ និងសិស្សានុសិស្សនៅសាលាបឋមសិក្សាទាំងពីរខាងលើបានចំនួន១២លើក (៣) បានរៀបចំសួនបំណិនជីវិតតាមសាលាទាំងពីរខាងលើ ដែលក្នុងនោះបានចូលរួមធ្វើរបងព័ទ្ធជុំវិញសួនប្រវែង១៥០០ម៉ែត្រ ដំឡើងស៊ីទែនទឹកចំនួន២ តប្រព័ន្ធបណ្តាញទុយោទឹកទៅក្នុងសួនដំណាំ ដំឡើងផ្ទាំងសូឡា និងម៉ូទ័របូមទឹកចំនួន១ឈុត និងចែកសម្ភារៈកសិកម្មផ្សេងៗដូចជា ធុងស្រោចដំណាំ ត្រេជ័របណ្តុះកូនបន្លែ និងគ្រាប់ពូជបន្លែចម្រុះជាដើមជូនដល់សាលា។
