រមណីយដ្ឋានប្រាសាទកោះកេរ មានក្រលាផ្ទៃសរុបចំនួន៨៧៨៩ហិចតា ៤៣អា និងគ្រប ដណ្តប់ភូមិចំនួនបីគឺ ភូមិកោះកេរ ភូមិរំចេក និងភូមិស្រយង់ជើង ក្នុងឃុំស្រយង់ ស្រុកគូលែន ខេត្តព្រះវិហារ។
គោលបំណងដើម្បីឲ្យមានប្រសិទ្ធិភាពក្នុងការគ្រប់គ្រងការប្រើប្រាស់ដីធ្លី សំណង់ ទិន្នន័យប្រជាសាស្រ្ត និងទប់ស្កាត់ការកាប់រានយកដីព្រៃថ្មីបន្ថែមទៀត ក្នុងតំបន់ការពាររមណីយដ្ឋានប្រាសាទកោះកេរ នៅក្នុងឆ្នាំ២០១៧ និង២០១៩។ អាជ្ញាធរជាតិព្រះវិហារ បានសហការអាជ្ញាធរខេត្តព្រះវិហារ រដ្ឋបាលព្រៃឈើ និងក្រសួងរៀបចំដែនដីនគរូបនីយកម្មនិងសំណង់ ចុះសម្រង់ក្បាលដី លំនៅដ្ឋាន និងសំណង់ និងដីកសិកម្មដែលអាស្រ័យផល។
លទ្ធផលការងារទទួលបានមានដូចជា៖
- បានស្រង់ទិន្នន័យក្បាលដីរបស់ភូមិកោះកេរ ភូមិរំចេក និងភូមិស្រយង់ជើង សរុប ១១១០ក្បាលដី ដែលកំពុងអាស្រ័យផល និងប្រើប្រាស់។
- បានស្រង់ទិន្នន័យលំនៅដ្ឋាន និងសំណង់ ដែលស្ថិតនៅក្នុងភូមិកោះកេរ ភូមិរំចេក និងភូមិស្រយង់ជើង បានសរុប ២៨៨ផ្ទះ បង្គន់៤៩ តូបលក់អីវ៉ាន់ ២០តូប ទ្រុងមាន់ ៥៩ និងទ្រុងគោក្របី ៣៨។
- បានស្រង់ទិន្នន័យប្រជាសាស្រ្ត នៅតាមភូមិកោះកេរ ភូមិរំចេក និងភូមិស្រយង់ជើង បានសរុប ១១៣៦នាក់។
