ប្រាសាទបល្ល័ង្កត្បូង (ឬប្រាសាទលិង្គទី៣) ជាប្រាសាទដ៏សំខាន់មួយ ក្នុងចំណោមប្រាសាទលិង្គទាំងបួន (ប្រាសាទថ្នឹង. ប្រាសាទបល្ល័ង្កជើង និងប្រាសាទអណ្តូងគុក) និងជាសំណង់ប្រាសាទតែមួយ សាងសង់ចំខ្សែបន្ទាត់អ័ក្សលិច-កើត និងនៅខាងកើតប្រាសាទធំ។ ស្ថានភាពបច្ចុប្បន្នប្រាសាទនេះរងការខូចខាតដោយការគាស់កកាយជីកគ្រឹះ និងបំបែកថ្មបល្ល័ង្ក។ ប្រាសាទនេះតាមការសិក្សាស្រាវជ្រាវ យើងឃើញមានតែបំណែកបល្ល័ង្គទំហំ២,៨៥ម៉ែត្របួនជ្រុង កម្ពស់២,២០ម៉ែត្រ និងមានលិង្គព្រះឥសូរទំហំអង្កត់ផ្ចិត០,៧៦ កម្ពស់២,៣០ម៉ែត្រដួលទៅទិសខាងលិច និងពុំឃើញមានស្លាក់ស្នាមសង់ដំបូលគ្របពីលើទេ។
គោលបំណងការងារអភិរក្ស និងជួសជុលប្រាសាទនេះ គឺសិក្សាស្រាវជ្រាវស្វែងយល់ពីបច្ចេកទេសបង្ហាប់គ្រឹះបុរាណ និងស្វែងរកបំណែកថ្មបល្ល័ង្កដែលបានកប់ក្នុងដី។ ម្យ៉ាងវិញទៀត ដើម្បីលើកតម្លៃប្រវត្តិសាស្រ្ត ទេសភាពវប្បធម៌ក្នុងរមណីយដ្ឋានឲ្យកាន់តែល្អប្រសើរ។
លទ្ធផលទទួលបាន គឺបានចងក្រងឯកសារពីស្ថានភាពគ្រឹះ និងបច្ចេកទេសបង្ហាប់គ្រឹះបុរាណ។ បន្ថែមពីនេះ បានរកឃើញបំណែកថ្មបល្ល័ង្កកប់ក្នុងដីស្ទើរគ្រប់ចំនួន ដែលអាចជួសជុលបាន។ ក្រុមការងារបានសិក្សាលម្អិត ពីស្ថានភាពពុកផុយថ្មនីមួយៗ ដើម្បីលើកផែនការឲ្យបានម៉ត់ចត់ លើការងារជួលជុលប្រាសាទនេះ។ មិនត្រឹមតែប៉ុណ្ណោះ យើងធ្វើសិក្ខាសាលាស្តីពីការងារ អភិរក្សថ្ម ដើម្បីស្វែងរកបច្ចេកទេស និងសម្ភារៈជួសជុល។
