ព័ត៌មានទូទៅ

ថ្ងៃអាទិត្យ ៩ កើត ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៨ ខែកុម្ភៈ ឆ្នាំ២០២៤ អាជ្ញាធរជាតិព្រះវិហារប្រចាំនៅរមណីយដ្ឋានប្រាសាទកោះកេរ បានសហការជាមួយវិទ្យាស្ថានបច្ចេកវិទ្យាកម្ពុជា ចុះប្រមូលទិន្នន័យភូគព្ភសាស្រ្តក្នុងបរិវេណប្រាសាទចិន ដើម្បីសិក្សាអំពីស្រទាប់ដី និងភាពហាប់ណែនរបស់ដីដែលជាបច្ច័យដល់ការវាយតម្លៃអំពីកម្រិតហានិភ័យនៃរចនាសម្ព័ន្ធសំណង់ប្រាសាទ។ បន្ថែមលើសពីនេះទៀត ក៏មានការសិក្សាអំពីស្ថានភាពដីលើខ្នងទំនប់បុរាណខាងជើងភូមិកោះកេរ ដើម្បីរៀបចំផែនការជួសជុលឡើងវិញ និងធ្វើជាផ្លូវវង់ទស្សនាទេសចរណ៍នាពេលអនាគត។ ក្រុមការងារក៏បានវាយតម្លៃបច្ចេកទេសសាងសង់ជណ្តើរឡើងប្រាសាទប្រាង្គ ដើម្បីធានាថា ការអនុវត្តការងារបានដើរតាមបច្ចេកទេសត្រឹមត្រូវ មានភាពរឹងមាំ និងមានសោភណ្ឌភាពល្អ។