Thursday, May 7, 2026
ឯកឧត្តមបណ្ឌិត ធន់ វឌ្ឍនា អនុប្រធានទី២ នៃព្រឹទ្ធសភា ដឹកនាំប្រតិភូព្រឹទ្ធសភា បំពេញទស្សនកិច្ចសិក្សាស្វែងយល់អំពីការខូចខាតជាក់ស្តែងនៅលើប្រាសាទព្រះវិហារ ដោយមានការចូលរួមពី ឯកអគ្គរដ្ឋទូតសហភាពអឺរ៉ុប (EU) ឯកអគ្គរដ្ឋទូតទីម័រឡេស្តេ ព្រមទាំងតំណាងមកពីស្ថានទូតចិន, ជប៉ុន, ឥណ្ឌូណេស៊ី, វៀតណាម និងឡាវ កាលពីថ្ងៃទី៧ ខែឧសភា ឆ្នាំ២០២៦។
ក្នុងដំណើរទស្សនកិច្ចនោះ ឯកឧត្តមបណ្ឌិត ធន់ វឌ្ឍនា បានសម្តែងការសោកស្តាយចំពោះការខូចខាតយ៉ាងធ្ងន់ធ្ងរលើបេតិកភណ្ឌពិភពលោកប្រាសាទព្រះវិហារ ដោយសារជម្លោះប្រដាប់អាវុធកាលពីខែកក្កដា និងខែធ្នូ ឆ្នាំ២០២៥កន្លងទៅ ដែលទាមទារឲ្យធ្វើអន្តរាគមន៍បន្ទាន់ដើម្បីទប់ស្កាត់ការខូចខាតបន្តទៀតដោយសារភ្លៀងនៅក្នុងរដូវវស្សាខាងមុខ។
ឆ្លៀតក្នុងឱកាសនោះ ឯកឧត្តមប្រធានប្រតិភូ ក៏បានបញ្ជាក់ថាតំបន់បេតិកភណ្ឌពិភពលោកដែលជាសម្បត្តិរួមរបស់មនុស្សជាតិគួរត្រូវរួមគ្នាការពារ និងថែរក្សាឲ្យបានគង់វង្ស ហើយមិនគួរក្លាយជាឧបករណ៍នៃជម្លោះឡើយ។ ដំណើរបេសកកម្មស្វែងយល់ដែលមានការចូលរួមពីតំណាងអង្គទូតសំខាន់ៗនាពេលនេះ គឺជាសក្ខីភាពនៃឆន្ទៈរបស់កម្ពុជា ដែលចង់ដោះស្រាយជម្លោះដោយសន្តិវិធីស្របតាមច្បាប់អន្តរជាតិ។
