បុគ្គលិកអាជ្ញាធរជាតិព្រះវិហារប្រមាណជាង៦០រូប បម្រើការនៅរមណីយដ្ឋានប្រាសាទកោះកេរ និងប្រាសាទព្រះវិហារ បានទទួលបទពិសោធ និងចំណេះដឹងអំពីវិធីសាស្រ្តសង្រ្គោះបឋម ពីមន្ទីរពេទ្យកុមារអង្គរខេត្តសៀមរាប ដើម្បីប្រើប្រាស់ប្រចាំថ្ងៃសម្រាប់ជួយដល់ភ្ញៀវទេសចរនៅពេលជួបគ្រោះថ្នាក់ចៃដន្យអំឡុងពេលទស្សនាប្រាសាទ។
ថ្លែងនៅក្នុងសិក្ខាសាលាស្តីពី “ការសង្រ្គោះបឋម” ពេញមួយថ្ងៃ រៀបចំដោយនាយកដ្ឋាអភិវឌ្ឍន៍ទេសចរណ៍នៃអាជ្ញាធរជាតិព្រះវិហារ នៅស្នាក់ការអាជ្ញាធរជាតិព្រះវិហារប្រចាំរមណីយដ្ឋានប្រាសាទកោះកេរ ថ្ងៃទី២៧ ខែមីនា ឆ្នាំ២០២៦នេះ ឯកឧត្តម ឃូ អៀងហួត អគ្គនាយករងអាជ្ញាធរជាតិព្រះវិហារ មានប្រសាសន៍ថា វគ្គបណ្តុះបណ្តាលសង្រ្គោះបឋមនេះ ពិតជាមានសារៈសំខាន់ណាស់ចំពោះការគ្រប់គ្រងទេសចរណ៍ ជាពិសេសសម្រាប់បុគ្គលិករបស់អាជ្ញាធរជាតិព្រះវិហារ ដែលកំពុងបម្រើការប្រចាំថ្ងៃនៅតាមប្រាសាទនានាក្នុងរមណីយដ្ឋាន ដូចជាភ្នាក់ងារទេសចរ បរិស្ថានុរក្ស និងពលករ អាចជួយអន្តរាគមន៍សង្រ្គោះបន្ទាន់បានភ្លាមៗនៅពេលដែលភ្ញៀវទេសចរជួបគ្រោះថ្នាក់ណាមួយចៃដន្យ មុននឹងបញ្ជូនមកកាន់មន្ទីរពេទ្យដែលនៅជិតបំផុត។ ទោះជាបែបនេះក្តីឯកឧត្តមបន្ថែមថា ចំណេះដឹងសង្រ្គោះបឋមទាំងអស់នោះ មិនត្រឹមតែបានជួយដល់ភ្ញៀវទេសចរប៉ុណ្ណោះទេ វាក៏អាចជួយសង្រ្គោះដល់ក្រុមគ្រួសារ ឬប្រជាជនក្នុងតំបន់ ដែលជួបប្រទះគ្រោះថ្នាក់ជាយថាហេតុដូចគ្នាដែរ។
លោក កុល សុខគ្រី ប្រធានផ្នែកកម្មវិធីកសាងសមត្ថភាព និងអប់រំសុខភាពនៅតាមសាលារៀន នៃមន្ទីរពេទ្យកុមារអង្គរខេត្តសៀមរាប និងលោកគ្រូអ្នកគ្រូពេទ្យ បានចែករំលែកចំណេះដឹងយ៉ាងយកចិត្តទុកដាក់អំពីការសង្រ្គោះបឋម និងអនុវត្តផ្ទាល់ជាមួយសិក្ខាកាម ទៅលើស្ថានភាពគ្រោះថ្នាក់ចៃដន្យចំនួន១២ រួមមាន៖ ការសង្រ្គោះបេះដូង ការស្លាក់ លង់ទឹក រលាក ថ្លោះគ្រេច បាក់ឆ្អឹង ហូរឈាម ឆក់ចរន្តអគ្គិសនី ល្ហិតល្ហៃអស់កម្លាំង ប្រកាច់ សត្វល្អិតទិចឬខាំ និងពស់ចឹក។
គួររំលឹកថា គិតត្រឹមខែមីនា ឆ្នាំ២០២៦នេះ ភ្នាក់ងារទេសចរបម្រើការក្នុងរមណីយដ្ឋានប្រាសាទកោះកេរ បានជួយសង្គ្រោះបឋមដល់ភ្ញៀវទេសចរជាតិ និងបរទេស ដែលចូលមកទស្សនាក្នុងរមណីយដ្ឋានកោះកេរបានចំនួន១១ករណី ក្នុងមាន៖ករណីគ្រោះថ្នាក់ចរាចរណ៍ ៤ករណី ខ្យល់គ១ករណីគ្រេចជើង២ករណី ដួលរលាត់ស្បែក ២ករណី និងសត្វល្អិតទិចចំនួន២ករណី។
