ស្ពានហាលនៅចន្លោះគោបុរៈទី៤និងទី៥ មានប្រវែង៣០០ម៉ែត្រ និងមានបង្គោលសីមាផ្កាឈូកនៅអមសងខាងចំនួន ១៣៤បង្គោល។ បច្ចុប្បន្នស្ពានហាលផ្នែកខាងកើតបានខូចខាតខ្លះ ហើយ បង្គោលសីមាផ្កាឈូកបានដួលបាក់បែក និងបាត់ អស់ជាច្រើនដោយសារធម្មជាតិ និងការបំផ្លាញដោយមនុស្ស។
គោលបំណង គឺដើម្បីធ្វើផែនទីហានិភ័យស្ពានហាល វិភាគពីការខូចខាត ចុះបញ្ជី និងជួសជុលបង្គោលសីមាផ្កាឈូក។ ការជួសជុលនេះគឺដើម្បីកែលម្អសោភ័ណភាពស្ពានហាលចន្លោះគោបុរៈទី៤និងទី៥ឲ្យកាន់តែប្រសើរឡើង។
លទ្ធផលទទួលបានចាប់ពីឆ្នាំ២០១០ ដល់ឆ្នាំ២០២២គឺ នាយកដ្ឋានអភិរក្ស និងបុរាណវិទ្យា បានស្រង់ប្លង់ស្ពានហាលទាំងមូល ថតរូបភាព photogrammetry ចុះបញ្ជីបំណែកបង្គោលសីមាទាំងអស់ ធ្វើផែនទីហានិភ័យដើម្បីវាយតម្លៃការខូចខាតរបស់ស្ពានហាល និងលើកផែនការអភិរក្ស និងជួសជុល។ ក្រុមការងារបានអភិរក្សនិងជួសជុលបង្គោលសីមាផ្កាឈូកបានចំនួន៥៦ ឲ្យឈរចូលទីតាំងដើមវិញ ជាពិសេសបង្គោលផ្កាឈូកនៅក្បែរគោបុរៈទី៤។
