កិច្ចការពារ និងការអភិរក្ស

នៅថ្ងៃសៅរ៍ ១១រោច ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៤ ខែមីនា ឆ្នាំ២០២៦ លោក ម៉ក់ ឌឿង អនុប្រធាននាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ ដឹកនាំមន្រ្តីចុះទៅទទួលវត្ថុបុរាណចំនួន២​ ពីលោក សាន សែន មេបញ្ជាការរង មូលដ្ឋានកងរាជអាវុធហត្ថស្រុកជាំក្សាន្ត នៅផ្ទះរបស់គាត់ ស្ថិតនៅភូមិអូរក្សាន្ត ឃុំទឹកក្រហម ស្រុកជាំក្សាន្ត ខេត្តព្រះវិហារ។

វត្ថុបុរាណដែលបានប្រគល់ជូនមានចំនួន២ រួមមាន៖ បំណែកផ្ដែរធ្វើពីថ្មក់ភក់មានចំនួន២បំណែក និងកុលាលភាជន៍មួយ មានរាងដូចសត្វហង្ស។ បច្ចុប្បន្ន វត្ថុបុរាណទាំង២ប្រភេទនេះបានយកទៅរក្សាទុកនៅរោងជាងសារមន្ទីរធម្មជាតិសាកលសម្តេចតេជោ ហ៊ុន សែន ព្រះវិហារ ដើម្បីធ្វើការចុះបញ្ជី អភិរក្ស និងសិក្សាវិភាគបន្ថែម។ ការផ្តល់ជូននេះបង្ហាញពីការចូលរួមសំខាន់ក្នុងកិច្ចការពារ និងថែរក្សាវត្ថុបុរាណ ដែលជាបេតិកភណ្ឌវប្បធម៌ដ៏មានតម្លៃសម្រាប់ជាតិ និងសម្រាប់អ្នកជំនាន់ក្រោយ។