កិច្ចការអភិវឌ្ឍន៍សហគមន៍នៅរមណីយប្រាសាទកោះកេរ គឺជាកិច្ចការអត្ថិភាពមួយដែលត្រូវយកចិត្តទុកដាក់ខ្ពស់ និងបានបញ្ចូលទៅក្នុងផែនការមេរបស់អាជ្ញាធរជាតិព្រះវិហារ។ ដោយកម្រិតជីវភាពរបស់អ្នកសហគមន៍កោះកេរនៅមានកម្រិតចំណូលទាប និងទទួលបានការអប់រំពុំបានគ្រប់គ្រាន់ដូចសហគមន៍នៅជិតទីប្រជុំជន បានធ្វើឲ្យបញ្ហាប្រឈមជាច្រើនកើតឡើង។ ឧទាហរណ៍ការយល់ដឹងអំពីអនាម័យ គឺនៅមានកម្រិត ដោយសារមិនមានបង្គន់អនាម័យខ្វះទឹកស្អាតសម្រាប់ប្រើប្រាស់ និងទទួលទាន និងខ្វះអនាម័យ។ ទន្ទឹមនឹងនេះរបរចិញ្ចឹមជីវិតប្រចាំថ្ងៃក៏ពឹងផ្អែកតែទៅលើព្រៃធម្មជាតិនៅជុំវិញ និងស្រែចំការដែលធ្លាប់អាស្រ័យផលកន្លងមក។
គោលបំណងចម្បងៗការងារគឺ ធានាឲ្យបាននូវការលើកកម្ពស់ជីវភាពប្រជាសហគមន៍ឲ្យប្រសើរជាងមុន ផ្សព្វផ្សាយអំពីសុខភាពអនាម័យក្នុងសហគមន៍ និងចូលរួមចំណែកអភិវឌ្ឍន៍តាមរយៈការជួយសាងសង់ហេដ្ឋារចនាសម្ព័ន្ធរូបវន្ត័បម្រើដល់តម្រូវការចាំបាច់ប្រចាំថ្ងៃជាដើម។
លទ្ធផលការងាររហូតមកដល់២០២២ ក្រុមការងារអភិវឌ្ឍន៍សហគមន៍ប្រចាំរមណីយដ្ឋានប្រាសាទកោះកេរ បានអនុវត្តការងារខ្លួនតាមផែនការដែលបានគ្រោងទុក និងទទួលបានលទ្ធផលសំខាន់ដូចខាងក្រោមនេះ៖ (១) បានចូលរួមសហការស្តារស្រះបុរាណ ឬ ”ត្រពាំងត្រាច” មួយកន្លែង ដែលមានទំហំ ២០ម៉ែត្រ x ២៥ម៉ែត្រ និងជម្រៅ ៣ម៉ែត្រ នៅក្នុងភូមិកោះកេរ កាលពីឆ្នាំ២០២០ ដោយប្រើថវិកាមូលនិធិអង្គរ (២) បានខួងអណ្តូងស្នប់២កន្លែង ចែកពាងទឹកចំនួន៤០ និងធុងចម្រោះទឹកស្អាតចំនួន៣០សម្រាប់ដាក់ទឹកទទួលទាន (៣) បានសាងសង់អគារបណ្ណាល័យឈើ ប្រក់ស័ង្កសីមួយអគារ (១ជាន់) មានទំហំ៦ម៉ែត្រ x ១២ម៉ែត្រ ជូនដល់សាលាបឋមសិក្សារំចេក និងចែកសម្ភារៈសិក្សាដល់សិស្សានុសិស្សនៅរមណីយដ្ឋានប្រាសាទកោះកេរ (៤) បានតម្លើងប្រព័ន្ធទឹកស្អាតសម្រាប់ហូប និងទឹកសម្រាប់លាងសម្អាតដៃដល់សិស្សានុសិស្សសាលាបឋមសិក្សាតាប្រា ដែលក្នុងនោះមាន៖ សង់ជើងទម្រឈើកម្ពស់៣ជាន់ ស៊ីទែនទឹកចំនួន២ ធុងចម្រោះទឹកស្អាតចំនួន៦ និងប្រព័ន្ធទុយោចែកចាយទឹក និងសង់បង្គន់អនាម័យ១ខ្នងមាន២បន្ទប់ ។
