ក្រោយពីបានទល់ទ្ររចនាសម្ព័ន្ធជណ្តើរខាងកើតប្រាសាទប្រាង្គ ដែលប្រឈមគ្រោះថ្នាក់រួចមកក្រុមបុរាណវិទូបានរើថ្មកាំជណ្តើរ ថ្មបាយក្រៀម និងថ្មភក់ដែលធ្លាក់រប៉ាត់រប៉ាយពីជាន់ខាងលើបា្រសាទប្រាង្គទៅរក្សាទុកនៅផ្នែកខាងក្នុងកំពែងខាងត្បូង។ បន្ទាប់ មកក្រុមការងារបានពិនិត្យឃើញថា មានរចនាសម្ព័ន្ធថ្មបាយក្រៀមដែលអាចជាគ្រឹះរបស់សំណង់អគារអ្វីមួយនៅផ្នែកខាងមុខ ជណ្តើរខាងកើត។
គោលបំណងដើម្បីចង់ដឹងពីរចនាសម្ព័ន្ធគ្រឹះ ក្រុមបុរាណវិទ្យាបានសម្រេចចិត្តលើកផែនការធ្វើកំណាយស្រាវជ្រាវ ដោយបាន បើករណ្តៅកំណាយចំនួន ១៤ ដើម្បីសិក្សារចនាសម្ព័ន្ធគ្រឹះនេះ។
លទ្ធផលកំណាយទាំង១៤រណ្តៅនៅបរិវេណខាងមុខប្រាសាទប្រាង្គបង្ហាញថា មានការរៀបចំគ្រឹះដែលធ្វើអំពីការបុកបង្ហាប់កំទេចថ្មបាយក្រៀម និងបំណែកកុលាលភាជន៍ ដើម្បីសាងសង់សំណង់ឈើប្រក់ក្បឿងពីលើសម្រាប់ប្រើប្រាស់ជាកិច្ចពីធីផ្សេងៗ ថ្វាយទៅប្រាសាទប្រាង្គ។
