ប្រាសាទក្រចាប់សាងសង់ពីឥដ្ឋមានប្រាង្គចំនួនប្រាំ ព័ទ្ធដោយកំពែងពីរជាន់សង់ពីថ្មបាយ ក្រៀម និងខ្លោងទ្វារពីរ សង់ពីថ្មភក់នៅទិសខាងកើតនិងខាងលិច។ ដោយសារប្រាសាទនេះ មានលក្ខណៈពិសេស ទើបអាជ្ញាធរជាតិព្រះវិហារសម្រេចជ្រើសរើសប្រាសាទនេះជាប្រាសាទគំរូលើកិច្ចការងារស្រាវជ្រាវ អភិរក្ស និងជួសជុល។ ក្រោយពីបានស្តារដីចាក់បង្គរចេញនៅដំណាក់កាលទី១ ក្នុងឆ្នាំ២០២២ តួប្រាង្គផ្នែកឦសានក្នុងចំណោមតួប្រាង្គទាំងប្រាំមានសភាពទ្រុឌទ្រោមជាងគេ ទើបយើងសម្រេចជ្រើសជាទីតាំងតំបូងសម្រាប់ជួសជុល។
គោលបំណងការជួសជុលលើប្រាង្គឦសាននេះ អាជ្ញាធរជាតិព្រះវិហារមានទិសដៅ បង្រៀនអ្នកជំនាញវ័យក្មេងឲ្យមានចំណេះដឹងលើការងារជួសជុលប្រាសាទឥដ្ឋ ដោយបានបញ្ជូនពួកគេទៅរៀនសូត្ររយៈពេលមួយខែនៅរមណីយដ្ឋានសំបូរព្រៃគុក និងរមណីយដ្ឋានអង្គរ។ ឆ្លងកាត់ការរៀនសូត្រនោះ អ្នកបច្ចេកទេសបានអនុវត្តដោយជោគជ័យ លើការទប់ស្កាត់ការដួលរលំរចនាសម្ព័ន្ធប្រាសាទដែលកំពុងស្ថិតក្នុងហានិភ័យខ្ពស់។
ជាលទ្ធផលទទួលបាន ការពង្រឹងជញ្ជាំងខាងកើត ទាំងខាងក្នុង និងខាងក្រៅបាន១០០ភាគរយ។ បានពង្រឹងជញ្ជាំងខាងត្បូង ទាំងខាងក្នុង និងខាងក្រៅបាន១០០ភាគរយ និងបានពង្រឹងជញ្ជាំងខាងជើង ទាំងជញ្ជាំងខាងក្នុង និងខាងក្រៅបាន៨០ភាគ រយ។ គម្រោងនេះកំពុងបន្តអនុវត្តដោយការចងក្រឯកសារជួសជុលស៊ុមទ្វារច្រកចូលខាងលិចបន្ថែមទៀត។
